Veeraan Mann

Khayaalon ne jaise dastak dena hi bandh kar diya,
Yeh veeraan mann ab bechain hone laga hai,
Jis ko padhkar kora kaagaz bhar leta tha
Woh Mann bhi ab kora hone laga hai,

Jab zindagi ke aaine mein khud ko talaasha tha,
tab shabdon ki kaarigari se maine kuch taraasha tha,
woh khayaalon ka mahal sang-e-marmar ka naa sahi,
uski khoobsurti mein magar, hai kashish ab bhi wahi,

Lafzon se sajaa ke, ek naya afsana bayaan karu,
Mere yaar-doston ka ab yeh sujhaav hai,
Unki yeh khwaahish puri na kar paa raha,
Kyunki mandraa raha gumnaami ka khauf ab bhi,
aur pad raha shauhrat ka dabaav hai..

Shauhrat toh sirf ek chalava hai, 
Jisne mere mann mein ghar kar liya,
Aur gumnaam ka darr bhi bewajah tha,
jise maine apne andar bhar diya.

Ab karna iss darr ko inkaar hai,
Ki mere shabdon ka jaal bunta hai meri Mohabbat se,
Aur yaad dilana hai iss veeraan dikhte mann ko
Ki woh ab bhi ek nayaab fankaar hai.

Maaloom hota hai ki safar phir se shuru karna padega
 Apne andar ki ek nai manzil talaashne ke liye
Kyunki jisko maana tha mahal, woh sirf ek minar hai,
sahara lena baaki hai, naye khayaalon ka, naye alfaazon ka
Apne mann ke mahal ko taraashne ke liye.